Sa Die Internatzionale de sa Limba Materna 21 Freàrgiu 2023

Su Servìtziu Linguìsticu de su Comunu de Carbònia partètzipat a Sa Die Internatzionale de is Limbas Maternas posta a campu dae s'UNESCO pro promòvere is limbas maternas, sa diversidade linguìstica, culturale e su multilinguismu.

Nois is Sardos semus sa minoria linguìstica prus manna de sa Repùblica Italiana chi ddu reconnoschet e amparat cun sa Lege 482 de su 1999.

A imparare su sardu a is pipios est a ddis fàghere unu donu mannu chi ddis at a abarrare totu sa vida.

Is chircas in contu de bilinguismu* narant chi:

• is pipios bilìngue sunt acostumados a furriare dae unu còdighe linguìsticu a s'àteru, cunforma a su bisòngiu, pro custu s'arresonu insoro tenet a disponimentu unu campu de ideas prus largu;

• sunt prus àbiles a si nde iscabùllere dae is problemas e aguantant mègius s'atentzione;

• imparant a iscrìere a in antis de is àteros, cun prus fatzilidade imparant àteras limbas e tenent prus possibilidades in sa vida e in su traballu;

• imbetzende, ant a tènnere prus resistèntzias contras a is maladias de sa memòria.

Insaras, it'est chi tocat a fàghere?

A faeddare su sardu a is pipios giai dae criaduras!

• Podet èssere totu sa famìlia chi ddis faeddat sardu o finas unu parente isceti, bastet chi onniunu aguantet firmu s'avesu.

• Cando is pipios andant a iscola bolent sighidos a faeddare in sardu finas si s'ant a ghetare a s'italianu.

In iscola italianu, in domo sardu!

Cun su tempus pipias e pipios ant a agatare s'echilìbriu e ant a essire (a su mancu) bilìngue perfetos!

Sa limba est bia, si dda faghimus bìvere!

* “Il Cervello Bilingue” Carocci 2020 - Garaffa, Sorace, Vender.
* Bilingualism Matters - Bilingualism Matters (bilingualism-matters.org) 

Iscarrìga su materiale in arta calidade:

https://drive.google.com/drive/folders/1b-_xINTiWBxZCduN4wORF8B1IgMDeExR?usp=sharing

 https://drive.google.com/drive/folders/1tauqIGvfIGLcUKYaD14ANKUnyyRPz6ZH?usp=sharing

.