Una borta a sa cida is sòtzi@s de sa LUTEC Universidadi de sa de Tres Edadi de Carbònia si pinnigant a pari me in sa sede insoru de Via Brigata Sassari e, acumpangiaus dae s'Operadore de Isportellu de su Servìtziu Lìngua Sarda de su Comunu de Carbònia Enrico Putzolu, lìgint librus in sardu e nd'istùdiant lèssicu e grammàtica. 

Sa faina nascit po s'ispèddiu sèmpiri prus ispainau de bolli torrai a oberai su sardu in sa vida de ònnia dii ma finas dae su si ndi sapiri chi tocat finas a istudiai po podi parai a sa farta de trasmissioni intergeneratzionali chi semus baliendi e po pòdiri bogai a foras sa lìngua nostra dae sa dilalia!

Peri is atòbius s'at lìgiu "Po Cantu Biddanoa" romanzu de Benvenuto Lobina, S'Intelligèntzia de Elias romanzu de Giuseppe Corongiu, Sa Domu de s'Orcu regorta de contus de Franciscu Carlini, e prus che totu su Ditzionàriu de sa Limba e Cultura Sarda de prof. Màriu Puddu.

In su merì de lunis 30 gennàrgiu 2023 anca est sa Biblioteca Comunale de Viale Arsia in Carbònia s'at presentau su libru de Gianni Loy “Eva e Petra – su Bocidòrgiu de Buggerru e su s'isciòperu generale”. Presenti s'Autori, s'Assessora a sa Pùbblica Istrutzioni Antonietta Melas e su Segretàriu de sa CGIL Sarda Simone Piddiu.

A in antis de una sala intipia de genti curiosidada (medas ndi funt aproliaus dae Buggerru) is trabballus ddus ant obertus cun is saludus de s'Assessora e de su Segretàriu de sa CGIL. A pustis Gianni Loy, giai prof. de economia in s'Universidade de Casteddu, at presentau s'òpera, iscrita bilingue sardu-italianu.

Su libru contat is regordus duas piciocheddas Eva e Petra, una filla de operajus, s'atra de is meris de sa miniera. Duas pipias chi cun is ogus insoru incocentis ant connotu is acontèssidas de su 1904 chi dae Buggerru ant ocasionau su primu isciòperu generale in Itàlia. Unu contu chi oi in dii fait profetu a is pipius chi depint isciri ita est costau a gudangiai deretus e a ddus mantenni e a is mannus po chi non si ddu iscarèsciant mai.

Peri sa presentatzioni s'Operadori de Isportellu Enrico Putzolu, cun s'invitu de s'Assessora Melas, at tentu ocasioni de presentai su Servìtziu Limba Sarda apenas incarreradu.